Nega bo‘lar zilzila?
G‘ulom Shomurod
Tengdoshlar davrasida,
So‘zlar jajji Jamila:
- Bilasizmi, ne uchun
Ro‘y beradi zilzila?
Yer ham odamga o‘xshab
O‘z yo‘lidan yuradi.
Goh sekin odimlasa,
Gohida yuguradi.
Ohujon
G‘ulom Shomurod
Muncha chiroyli o‘zing,
Ohujon.
Qop-qora shahlo ko‘zing,
Ohujon.
Yaqin borsam hurkasan,
Ohujon.
Sen nimadan qo‘rqasan,
Ohujon.
Xitob
Nurullo Oston
Kuz quyoshi yoqimli,
Ko‘kda turna oqimi.
Soy suvlari tiniqar,
Chollar kunda miriqar.
Kuz
Muhammad Yusuf
Suvo‘tlari to‘la irmoqni
Muzdek qilib qo‘ydi sunbula.
Yer tortqilab barqut yaproqning
Yuragiga soldi g‘ulg‘ula.
Kitob o‘qigan bola
Po‘lat Mo‘min
O‘rganar avval odob
Kitob o‘qigan bola.
Yuzi bo‘ladi oftob
Kitob o‘qigan bola.
Hurmat qilar kattani,
Kichiklar jon-u tani,
Bajaradi va’dani —
Kitob o‘qigan bola.
Qora mushukcha
Ma’mur Qahhor
Oyi, qora mushukchaga
Popuk taqib qo‘yaylik.
Oyi, qora mushukchani
Oppoq rangga bo‘yaylik.
Shunda qora mushukchani
Quvmas daydi bolalar.
“Falokatning belgisi” deb
Atamaydi xolalar.
Chigirtka
Aziz Abdurazzoq
— Hoy, chigirtka, chigirtka,
Sen ham ekin yeysanmi?
Hoy, chigirtka, chigirtka,
Ekmay tekin yeysanmi?
— Men ham ekin yeyman, ha,
Lekin tekin yemayman.
Yesam halol deyman, ha,
Sira tekin demayman.
